Нийгмийн даатгалын ерөнхий газрын даргын зөвлөл 21 аймгийн Нийгмийн даатгалын газар, 330 сумын нийгмийн даатгалын ажилтнуудтай 2025 оны 03 дугаар сарын 12-ний өдөр цахимаар уулзалт хийлээ. Уулзалтаар тэдний нийгмийн баталгааны асуудал, цалин хөлс, урамшуулал, ажлын хариуцлага, сахилга бат, ажлын байрны нөхцөл боломж болон нийгмийн даатгалын хууль тогтоомжийг хэрэгжүүлэхэд анхаарах асуудлаар мэдээлэл зөвлөмж өгч, даргын зөвлөлөөс дараах чиглэлийг өглөө. Үүнд:

1. Орон нутгийн төрийн болон төрийн бус байгууллагууд, хувийн хэвшилтэй хамтран ажиллаж, нийгмийн даатгалын хууль, тогтоомжийг сурталчлах ажлыг эрчимжүүлэх;
2. Зорилтот бүлгүүдэд чиглэсэн тусламж, үйлчилгээний чанар, хүртээмжийг сайжруулах, иргэд, ажил олгогч, даатгуулагчдыг тогтмол мэдээ мэдээллээр хангаж, нийгмийн даатгалын үйлчилгээг нээлттэй, ил тод, түргэн шуурхай үзүүлэх;
3. Хууль тогтоомж зөрчсөн аливаа хууль бус үйлдлийг хариу арга хэмжээ авч таслан зогсоох, шаардлагатай тохиолдолд дээд шатны байгууллагадаа мэдэгдэх;
4. Хувийн зохион байгуулалтыг сайжруулж ажлын бүтээмжийг нэмэгдүүлэх, ашиг сонирхлын зөрчлөөс ангид байж хууль, тогтоомжийг чандлан сахиж ажиллах зэрэг болно.

Мөн аймгуудын нийгмийн даатгалын газрын дарга нарт ажилтнуудын мэдлэг, ур чадварыг дээшлүүлэх сургалтуудыг тогтмол зохион байгуулж, ажлын ачааллыг бууруулах, нийгмийн баталгааг хангахад чиглэсэн арга хэмжээ авч ажиллахыг үүрэг болголоо.