НИЙГМИЙН ДААТГАЛЫН ҮЙЛЧИЛГЭЭНИЙ ЦАХИМЖУУЛАЛТЫГ ЭРЧИМЖҮҮЛНЭ

Нийгмийн даатгалын байгууллага ажил олгогч, даатгуулагчдад 34 төрлийн үйлчилгээ үзүүлдэгээс 24 төрлийн үйлчилгээг цахимжуулсан. Үүнээс 18 төрлийн үйлчилгээг E-Mongolia цахим системийн нэгдсэн порталд холбоод байна.

Цаашид энэ ажлыг эрчимжүүлэх зорилгоор Нийгмийн даатгалын ерөнхий газрын даргын зөвлөл 2025 оны 03 дугаар сарын 13-ны өдөр НДЕГ-ын дэргэдэх Мэдээллийн технологийн төвийн хамт олонтой уулзалт зохион байгуулав.

Нийгмийн даатгалын үйлчилгээг бүрэн цахимжуулснаар нийгмийн даатгалын үйлчилгээ шилэн, ил тод, түргэн шуурхай, авилга, ашиг сонирхлын зөрчлөөс ангид байх боломж бүрдэнэ.

Иймд цахимжуулалтын ажлыг эрчимжүүлэх шаардлагатай байна гэдгийг Нийгмийн даатгалын ерөнхий газрын дарга Б.Батжаргал онцоллоо.

Газрын даргын зөвлөлийн хурлаас системийн шинэчлэлийг 2025 онд багтаан бүрэн дуусгах, программын алдааг яаралтай засах, серверүүдийн ачааллыг тэнцвэржүүлэн, эрсдлээс урьчилан сэргийлж, аюулгүй байдлыг хангах асуудлыг шийдвэрлэх үүрэг өглөө.