ОСОЛ ГЭМТЛИЙГ БУУРУУЛАХ ЧИГЛЭЛД ХБНГУ-ТАЙ ХАМТРАН АЖИЛЛАЖ БАЙНА.
Холбооны Бүгд Найрамдах Герман улсын Ослын Даатгалын газрын төлөөлөгчид 2015.07.10-2015.07.14 өдрүүдэд манай улсад албан айлчлал хийлээ. Айлчлалынхаа эхний өдөр Засгийн газрын хэрэгжүүлэгч агентлаг Нийгмийн даатгалын ерөнхий газарт хүрэлцэн ирж ажил хэргийн уулзалтанд оролцсон юм. Хоёр тал ослын даатгалын чиглэлд уламжлалт хамтын ажиллагаатай ба хамгийн сүүлд л гэхэд 2015 оны 04 дүгээр сарын 22-23-ны өдрүүдэд “ОСЛЫН НИЙГМИЙН ДААТГАЛЫН ТОГТОЛЦОО ХӨГЖИЛ: МОНГОЛ БА ГЕРМАН УЛСЫН ТУРШЛАГА” сэдэвт форумыг амжилттай зохион байгуулсан билээ. Энэ удаагийн айлчлалын нэг зорилго нь хамтран ажиллах төрөлжсөн нэг эмнэлгийг сонгох явдал байлаа. Энэ хүрээнд манай улсын Гэмтэл согог судлалын үндэсний төвд зочилон үйл ажиллагаатай нь танилцсан. Нийгмийн даатгалын сангаас 2014 онд Үйлдвэрлэлийн осол, мэргэжлээс шалтгаалсан өвчний улмаас тахир дутуу болсон 5425 тэтгэвэр авагчид 27.2 тэрбум төгрөг зарцуулсан байдалтай байгаа нь ахуйн болон үйлдвэрлэлийн осолд өртөгсдийн тоо өндөр байгаагийн нэг илрэл юм. Иймд Герман улсын осол гэмтлийг бууруулсан туршлагаас хуваалцах, авч хэрэгжүүлэх тал дээр анхааран шат дараатай ажлуудыг зохион байгуулахын сацуу иргэд даатгуулагчдыг осол гэмтэлд нэгэнт өртөсний дараа биш, осол гэмтлээс урьдчилан сэргийлэх чиглэлд илүү анхаарахыг зорилго болгон ажиллаж байна.
