Нийгмийн даатгалын ерөнхий газраас эмнэлэг хөдөлмөрийн магадлалын үйлчилгээний чанарыг сайжруулах, холбогдох хууль тогтоомжийн хэрэгжилтийг хангах зорилгоор “Эмнэлэг хөдөлмөрийн магадлалын чанарын аян”–ыг 2014 оны 10 дугаар сарын 1-ны өдрөөс эхлэн 2 сарын хугацаатай зохион байгуулахаар шийдвэрлэв.
Аяны нээлтийг Сонгинохайрхан дүүргийн Эрүүл мэндийн нэгдэл дээр 2014 оны 10 дугаар сарын 01-ны өдөр зохион байгуулав.
Нээлтийн үйл ажиллагаанд Нийгмийн даатгалын ерөнхий газрын дэд дарга О.Байгалмаа, Эмнэлэг хөдөлмөрийн магадлах төв комиссын дарга П.Мөнхтулга, Сонгинохайрхан дүүргийн Нийгмийн даатгалын хэлтсийн дарга Н.Энхтөр, Сонгинохайрхан дүүргийн Эрүүл мэндийн нэгдлийн дарга Ш.Хажидмаа болон тус дүүргийн хөгжлийн бэрхшээлтэй иргэдийн төлөөлөл оролцов.
Нээлтийн үеэр иргэд даатгуулагчдад эрүүл мэндийн үнэгүй үзлэг шинжилгээг хийн, иргэдийн жин, өндөр, цусны даралт болон цусан дахь сахарын хэмжээг тодорхойлон “Эрүүл амьдрах”, “Зохистой зөв хооллолт”-ын талаар сургалт зохион байгуулав.
Мөн Нийгмийн даатгалын удирдлага, Эмнэлэг хөдөлмөрийн магадлах төв комиссын гишүүд тус дүүргийн эмнэлэг хөдөлмөрийн магадлах комиссын хурлын үйл ажиллагаатай танилцан, иргэдтэй уулзаж зөвлөгөө өгөв.
Аяны хүрээнд эмнэлэг хөдөлмөрийн магадлах комиссын үйл ажиллагаанд тавих дотоодын хяналтыг эрчимжүүлэх, хөдөлмөрийн чадвар алдалтаас сэргийлэх, бууруулах, ахуйн болон үйлдвэрлэлийн осол, мэргэжлээс шалтгаалах өвчнөөс урьдчилан сэргийлэх чиглэлээр иргэд (даатгуулагч)-ийн дунд өдөрлөг, уулзалт зохион байгуулах, эрүүл мэндийн байгууллагатай хамтран эмнэлэг хөдөлмөрийн магадлах үйлчилгээний чанарыг сайжруулах олон улсын арга хэрэгслийг судлан нэвтрүүлэх зэрэг үйл ажиллагаа зохион байгуулах юм.
ЭХМТК
